2010年2月28日 星期日

賣米者ê長生術

欲用聽--ê tshih遮→時間:5分58秒

    古早時代,有一e5賣米e5米商,叫做李玨(kak),伊是廣陵江陰人。厝裡代代攏是白米買賣e5米商。Ti7彼個時代,做生理e5人多數掠足大賺,也就是一般人所講e5無奸不成商。政府有規定買賣米e5斗仔愛仝款,m7管是糶(thiò)出抑是糴(tia̍h)入,攏愛用仝一e5斗仔,m7閣,政府e5規定無啥人遵守,猶原是糴入用大斗,糶出用小斗。李玨in tsit間khah無仝款,李玨e5老爸遵照政府e5規定買賣,顛倒予同行e5米商恥笑。尾--a,tsit間店交予李玨經營,李玨m̄-nā延用老爸e5用斗方式,而且m7管是糴入抑是糶出,盡量予人客家己量斗,所以利sun5比以早閣khah少,m7閣,薄利多銷,生理比以前閣khah好。伊tsit種做法予in老爸知影了,不但無ka7伊責罵,而且呵咾講李玨有道德。李玨一世人賣米,賣到了八十歲。M7閣ti7伊六十歲彼年,李玨遇到一e5道士,學了胎息之術,而且ka7名改做李寬。

     後來,官府來了一e5節度使,名嘛號做李玨,是一e5外放e5相爺。有一e5閒暗,節度使半暝做一e5夢,伊夢見家己到了一e5山洞,洞口e5花開真濟,景色真sui2,鳥隻嘛ti7洞口飛kuan5飛低,叫聲清脆婉轉,天頂e5彩雲飄飄,瑞氣萬千。行入洞內,亭台樓閣,邊a閣有一港清幽e5泉水。李玨想講,tsia 應該是仙人le tua3 e5所在無m7著。李玨si3 ke3 行行--le,伊看著一片石壁,頂kuan5刻真濟人名,忽然間,伊看著伊e5名李玨予人刻ti7頂面,伊真歡喜,想講:可能是伊tsit世人做宰相做了真濟德澤百姓e5代誌,上天有感應,才會ka7我e5名刻ti7 tsia,我已經會當做仙a。李玨愈想愈歡喜,tsit e5 時陣,有二e5仙童行ua2來,伊就問仙童講,石壁頂e5李玨是m7是就是伊,仙童講,he是江陰賣米e5李玨,m7是相爺你喔。

    透早一起--來,昨暝e5夢境猶歷歷在目,伊愈想愈奇怪,就派人去江陰找賣米e5李玨,m7閣賣米e5李玨早就改名作李寬啊,而且年歲大退隱真濟年啊,所以一時嘛問無李玨tsit e5人。節度使李玨並無死心,伊命令江陰e5縣官用心去找,尾--a,總是去予找著。李玨派了馬車去邀請伊來府裡,非常好禮來接待,李寬雖然老啊,嘴鬚白siak siak,m7閣精神猶原足好。李玨知影李寬是有道行e5人,所以以道兄來稱呼。幾工後,李玨將伊e5夢境講予李寬聽,而且向伊請教道法仙術,李寬講伊be7曉啥物仙術。經過再三e5了解,tsiah知影原來李寬做生理看輕利sun5,厚待人客,積了陰德,受到上天e5加封,tsiah會留名ti7仙洞e5石壁頂kuan5。

    李寬活到100歲,欲過身嘛無病無苦。過身e5第三工,伊e5家屬發現李寬e5棺木去予pit去,眾人掀開棺材,kan-tann7看著李寬e5衫褲niâ,李寬已經金蟬脫殼,升天而去--a。

5 則留言:

  1. 你寫了足用心--ê,真讚!

    有一寡意見想欲kā你請教:

    1. 親像「官府『來了』1 ê節度使」這款動詞後壁加「了」ê完成態,敢是恁遐ê講法?一般這號用法是華語語法,我知--ê台語人是用「有+動詞」、「已經+動詞」kap句尾「--a」來表現,毋知你ê看法按怎?

    2. 較早ê語料--裡,「夢」kap「眠夢」本身就會使做動詞,比論:「節度使半暝做一 ê 夢」,若以早ê人,凡勢會講:「節度使半暝眠夢」。「做+夢」ná親像是華語借--來ê造詞法,這點嘛想欲請教。

    多謝!

    回覆刪除
  2. 感謝指正。

    1.台文ê發展猶佇起步kah整合ê階段。
    語法「來了」雖然是華語ê用法,有人kā用佇台語,但是這時陣若用文言發音,就袂感覺ngāi-gio̍h á。
    所以愛讀作「lâi-liáu」。

    2.眠夢是動詞無毋著。夢,敢袂使作名詞?

    3.語言是隨著時代,不時咧變化,華語嘛仝款。假使若無欲加入新ê語詞,咱就變成做「古早人」敢是?

    4.咱ê台語文正佇咧發展,用字、用詞、語法等,親像戰國時代,毋過,無標準嘛是現此時ê一種標準。

    回覆刪除
  3. 多謝!

    1. 台語目今若是有法語、德語彼款「正常」ê語言地位,按呢我無反對伊「全無考慮 tik」來吸收華語詞、華語語法。

    問題是,華語是台灣在地語言 ê killer language,這是事實,咱若無半點仔對華語詞、華語語法ê抵抗意識,無久,台語就會愈來愈成華語,了後,台語存在ê必要性就愈來愈受著質疑,若台語書寫、台語溝通予人感覺閣較無必要、閣較無伊ê特殊性ê時,台語欲死,會加真緊。

    「眠夢」kap「夢」攏會使做動詞,in無仝ê所在,是佇in ê論元結構(argument structure),「眠夢」無鬥受詞,夢定著愛接受詞。


    1a. 我昨昏規暝攏咧眠夢。
    1b.*我昨昏眠夢著阿全。(*表示無合法)

    2a.*我昨昏規暝攏咧夢。
    2b. 我昨昏夢著阿全。

    以上,互相討論。

    回覆刪除
  4. 請問這要怎麼聽呢?

    回覆刪除
  5. 原本這个blog是有支援我錄的聲音檔,後來就無支援,所以這馬無聲囉!

    回覆刪除