2010年2月23日 星期二

呆若木雞ê故事

欲用聽--ê tshih遮→時間:3分54秒

    Ti7古早春秋e5時代,有一e5真gau5訓練相拍雞e5人,叫做紀省子。彼e5時代時行"鬥相拍雞"做娛樂。齊宣王愛sng2鬥相拍雞,就請紀省子為宮廷訓練相拍雞。

    過了十工,齊宣王問講:「相拍雞訓練了按怎?」紀省子講:「Tsit隻雞雖罔勇健好鬥,m7閣虛浮急躁,驕傲e5心性猶未去除--leh。」

    閣過了十工了後,齊宣王問講:「相拍雞訓練了按怎?」紀省子講:「Tsit隻雞猶無夠鎮定,聽著聲就叫,看著影就跳。」

    一個月過去--a,齊宣王be7堪得等,問講:「敢猶未訓練好?」紀省子講:「猶閣未使--得,伊e5氣勢siunn tshia-iann7,外在e5焰氣siunn強。」

    十工後,紀省子抱著彼隻相拍雞來見齊宣王,秉告齊宣王講:「相拍雞訓練好--a,請陛下驗收。」講煞,隨將彼隻相拍雞放--出來,欲kah別隻來比看覓。齊宣王一下看,彼隻雞m7-na7體格無夠粗勇,嘛無敏捷liu2-liah e5動作,一隻戇戇khia7 ti7遐,假若是一隻柴刻e5柴雞--咧。M7閣,別隻雞,看著tsit隻雞按呢,遂驚kah走咧long7,m7敢ua2去伊e5邊--a。

    有一句成語講:呆若木雞,典故就是ui3 tsit e5故事來--e5。

    Tsit e5故事,主要是欲講道家「無為」e5思想,嘛是咧講道家修練e5內涵「性命雙修」。啥物是性命雙修呢?性是內在,就是咱e5自性,自性是本自具在,但是需要悟徹kah修練,內功無修,空有外功,終不可得。只有加強內外e5修為,自性kah形體作伙修煉,內外兼備,tsiah會當達到登峰造極e5境界。清靜章所講--e5,大成若缺,大盈若沖,大直若屈,大巧若拙,大辯若訥,正是此義。

3 則留言:

  1. 我讀到第二篇就覺得很想建議:你如果有講古的語音檔,會卡好,因為我看拼音較吃力,若用聽的會較輕鬆又有趣。

    歲玲留言

    回覆刪除
  2. 歹勢啦,若閣做錄音就真厚工--a,台文原本就是欲予對台文有興趣ê人看--ê,初初看卡無,加看幾擺就熟手--a。

    回覆刪除
  3. 道家「無為」e5思想--呆若木雞,真的很棒,希望有一天我們能達此修為。謝謝!

    回覆刪除