2010年2月23日 星期二

男人莫效百里奚

欲用聽--ê tshih遮→時間:6分51秒

    百里奚,五羊皮,憶前時,烹伏雌,炊扊扅,今日富貴忘我為!
Pik lí hê, ngó iông phî, ik tsiân sî, phing ho̍k tshú, tshui iám î, kim ji̍t hù kuì bōng ngó uî!
    百里奚,五羊皮,父粱肉,子啼饑,夫文繡,妻游衣。嗟乎,富貴忘我為?
Pik lí hê, ngó iông phî,hū liâng jio̍k, tsú thê ki, hu bûn siù, tshe iû i, Tsia--hoo hù kuì bōng ngó uî!
    百里奚,五羊皮,昔之日,君行而我啼,今之日,君坐而我離。嗟乎,富貴忘我為?
Pik lí hê, ngó iông phî,sik tsi ji̍t, kun hîng jî ngó thî, kim tsi ji̍t, kun tsō jî ngó lî, Tsia--hoo hù kuì bōng ngó uî!

    頂懸三tsuā詩詞是百里奚ê夫人杜氏所唱ê歌詞。翻作白話,意思是講:
百里奚啊百里奚,想起早前你欲離開彼當時,我刣雞母,拆門閂煮飯為你餞別,今仔日你得著榮華富貴,敢是kā我放袂記?
百里奚啊百里奚,你做老父--ê有飯有肉,恁囝是枵飢失頓,你做翁婿--ê穿kah媠媠,我做某--ê是衣衫襤褸。唉呀,你得著榮華富貴,敢是kā我放袂記?
百里奚啊百里奚,想起早前你欲離開彼當時,你ná行我ná哭,今仔日你坐佇遐,離我遠遠遠。唉呀,你得著榮華富貴,敢是kā我放袂記?

    佇2700年前,是中國ê春秋時代,有一个真出名ê大夫叫作百里奚。百里奚出世佇虞國,自細漢就無老父,kah老母過著艱苦ê日子,m̄閣百里奚認真讀冊,向望有一工會當入朝為官。到了三十幾歲,無人知影百里奚ê才華,母仔囝猶原過著貧困ê日子,彼一年,老母用全部ê家產,五領ê羊仔皮替伊娶杜氏為妻,生了後生孟明,日子猶原不度。百里奚決定欲離開故鄉去外面拍拼。

    百里奚來到了齊國,m̄閣百里奚初出茅廬,無人欲引薦,又閣來到宋國,拄著一个知音叫蹇叔,蹇叔將伊推薦予虞國大夫宮之奇,從此,百里奚做了虞國ê大夫,這中間,已經是過了十年啊。百里奚做官啊,所以伊就轉去故鄉,欲tshuā伊ê老母kah某囝上京,m̄閣,這十年來,故鄉拄著大天災,老母已經死啊,某囝嘛不知下落啊。

    百里奚雖然是大夫,m̄閣虞國國君昏庸,m̄聽百里奚kah宮之奇ê諫言(唇亡齒寒),煞予晉國來滅亡,百里奚煞成做晉國ê戰俘,變做一个奴隸。這時陣,晉國西爿ê秦國穆公向晉國求親(秦晉之好),百里奚成做一个陪嫁ê奴隸,心有不甘,佇半路就逃走,輾轉來到楚國,為楚國管理馬牛。秦穆公探聽出百里奚是一个不可多得ê人才,用計以五領羊仔皮去kā百里奚買--轉來。秦穆公重任百里奚做宰相,無幾年,秦穆公國力大增,成做歷史上ê春秋五霸。

    百里奚完成了少年時代ê夢想,m̄閣這時陣ê百里奚已經七十外歲啊,想起少年時陣,妻離子散,心情就鬱卒難以開朗。話講轉來百里奚ê家後杜氏,三四十年來,不時就咧揣伊ê翁婿,這擺,予伊探聽著秦國ê宰相號做百里奚,伊才揣機會進入宰相府,彈琴予百里奚聽,歌詞正是:百里奚,五羊皮,憶前時,烹伏雌,炊扊扅,今日富貴忘我為…。

    翁某分開四十年才閣相認,莫怪民間流傳著一句話講:男人莫效百里奚,女人莫學買臣妻。

2 則留言:

  1. 先輩:
    您真厲害!lai5 tsia1 hak8 sip8!kam2 in1 ~!

    用字參考:
    拼圖
    拍拚
    1 拍拚 phah-piànn  
    2 拚 piànn  
    3 拚血 piànn-hiat  
    4 拚暝工 piànn-mê-kang/piànn-mî-kang  
    5 拚命 piànn-miā  
    6 拚勢 piànn-sè  
    7 拚生死 piànn-senn-sí/piànn-sinn-sí  
    8 拚性命 piànn-sènn-miā/piànn-sìnn-miā  
    9 拚生理 piànn-sing-lí  
    10 拚俗 piànn-sio̍k  
    11 拚輸贏 piànn-su-iânn  
    12 拚水 piànn-tsuí  
    13 仙拚仙 sian-piànn-sian  
    14 捙拚 tshia-piànn

    回覆刪除
  2. 多謝指正!
    用字上好是有一个標準,我會盡量參考教育部ê建議用字。
    若有一工,台語成作台灣ê官方語言,用字就會漸漸統一。

    回覆刪除