2010年2月23日 星期二

神機妙算黃妙應

        佇勘輿學(kham ú hak8)內底,講究ê是天時、地利kah人和ê配合。三國時代,曹操會當雄霸北魏,是因為得著天時,東吳孫權會當獨霸江東,是因為得著地利,若劉備會當得荊州而不敗,是因為得人和。漢朝末年ê三國鼎立,就是因為勘輿學所講ê這三項要素,分別予三个國主得著,而且勢均力敵,歷史上才會出現這个有名ê朝代。

        唐朝ê末年,出世一个真出名ê地理師,叫做黃妙應,又名涅槃和尚、慧日禪師,相傳是福建泉州蒲田人。黃妙應是一个出家人,毋過真奇怪,伊剃度了後無欲穿袈裟,不受具足戒。佇閩南一帶為人看風水,定定都出語成讖,歷歷如卷,妙奪天工。涅槃和尚兼具禪師kah風水師ê雙重身份,是佛教本土化、世俗化,並且kah民間信仰漸趨融合ê典型人物。

        黃妙應一出世就無老父啊,而且一出世就得著軟骨症,二、三歲啊猶袂曉行路,嘛袂曉徛。伊ê老母無法度,將伊寄飼佇一間廟寺。黃妙應逐工佇廟寺ê前後庭院生活,食飯ê時陣,伊攏佇一个水池仔邊食,ná食,飯ná落落去水池仔底,拄好通飼池仔底ê一隻龜,日子一下久,彼隻龜煞成做黃妙應上好ê朋友。

        時間過得真緊,目一下nih,已經啊過了二十年。這一工,彼隻龜煞會開喙講話,伊開喙kā黃妙應講:你已經得欲出頭天啊!我是一隻佇這修練ê龜精,明仔載午時三刻就欲升天啊,佇升天進前,我會流目屎,你會當將我ê目屎ueh起來拭佇你ê目睭--ni,左目拭左目,正目拭正目,了後,正目會當觀天象,左目會當觀地理。第二工午時一到,黃妙應看著彼隻龜真正咧流目屎,伊就kā龜ê左蕊目睭ê目屎拭佇家己ê左蕊目睭頂懸,正蕊目睭就無閣拭啊,想講,兩粒目睭若攏拭,毋抵好若攏失明無看--ìnn,這馬軟骨就咧淒慘啊,啊若雙眼閣失明,毋著閣卡淒慘。突然間,黃妙應ê歸身軀筋骨開始疼--起來,閣無外久,漸漸袂疼啊,筋骨感覺硬-tsiānn-硬-tsiānn,出力kā徛起來看覓,ēe..,煞會當徛--起來,行看覓,閣會當行喔!伊才想講正蕊目睭猶未點咧,翻頭一下看,彼隻龜也已經升天而去。

        從此以後,黃妙應就以替人看風水地理為生,非常ê出名。有一工,伊ê阿兄問伊講:小弟啊,你這呢gâu看風水,哪毋替咱ê祖公仔揣一个好風水?黃妙應應講:好是好啦,毋閣,恐驚咱無彼ê福氣通享受!第二工,兩兄弟啊就kā祖公仔ê黃金甕仔挖--起來,欲揣一个好地理來埋葬。行啊行,來到一个大榕仔跤,天色也已經暗啊,黃妙應講:暫時咱就將黃金khǹg踮遮,明仔載才閣來揣。第三工,二兄弟來到--地,黃金甕仔煞無--去啊,阿兄講:tann欲按怎?黃妙應講:地理已經予咱得著啊,所以黃金嘛升天啊。阿兄聽著煞半信半疑。

        經過了一年,黃妙應ê阿嫂懷胎十個月得欲生產啊,黃妙應算算咧,顧佇厝--裡,毋敢離開三腳步,驚出門就出代誌。毋閣,來央請伊看風水ê人,再三懇求,黃妙應袂堪得人ê姑情,就按呢出門去囉。拄好黃妙應一踏出門無外久,伊ê阿嫂就生啊。頭一个生ê是查甫ê,毋過干焦一蕊目睭,而且一出世就會講話,講:一眼觀天象!怹老爸聽著驚一著,講這是一个妖怪,隨就kā tēnn--死。無外久,又閣出世一胎查甫ê,這个干焦生一隻手,而且嘛會講話,講:一手打天下!怹阿爸聽著驚kah皮皮tshuah,哪會見生都妖怪,這个嘛kā拍--死。煞--落來,又閣生了第三胎,這胎,五官端正,眉清眼秀,看著斯文斯文,一出世就開喙問講:啊大哥kah二哥咧?怹老爸應講:都攏予我拍--死啊,這个囡仔一下聽講大哥kah二哥已經死啊,煞咬舌自殺,嘛是死!

        黃妙應代誌辦煞,隨就趕轉來到厝,問講情形按怎?怹阿兄講:啊就連續生三个,如此這般。黃妙應真無奈,應講:無福氣就是無福氣,縱然揣會著好地理,嘛無一定得會著福報。正是:福地福人居,無福別人得,只恨枝無葉,莫怨太陽偏!

沒有留言:

張貼留言