2010年2月28日 星期日

老子kah伊ê薪勞

欲用聽--ê tshih遮→時間:4分53秒

    Tsit擺,欲來講一e5老子e5故事。咱攏知影老子是道教e5開基元祖。有真濟有關著老子e5傳說。道德經tsit本冊就是老子當時ti7函谷關欲出隱西方e5進前,所著作--e5。


    聽講,老子ti7中原e5時陣,生活kah一般人仝款,並無啥物神奇e5所在。伊有倩一e5薪勞(佣人)叫徐甲,替伊huat8落生活,當初時有講一月日e5薪水是100 e5錢。Tann a2開始,老子攏有照月日,付薪水予徐甲,m7閣尾--a就一直攏無予伊薪水--a。徐甲並無欠用著錢,所以也歹勢ka7老子開嘴,m7閣,伊一直攏有teh記數,逐個月記,時間過得真緊,嘛m7知經過了幾年,年久月深,老子可能早就be7記得愛付月俸予徐甲tsit件代誌--a。

    到kah有一天,徐甲知影老子看破東周e5氣數,ti2欲離開中原,往西方安息國隱居,伊無想欲tue3老子去安息國hit種艱苦所在食苦,伊tsiah想著欲ka7老子討工錢。伊就央人替伊寫一張討數(siau3)e5文書,tsit e5人一下算,攏總大約是30萬錢,換作時間,總共已經過了200幾年--a。替伊寫文書e5人驚一tio5,想講tu2著一e5仙人,m7敢怠慢,而且閣欲ka7伊e5查某囝嫁予徐甲,徐甲看了有甲意,就ka7伊娶起來做某。

    Tsit e5時陣,老子已經來到函谷關,tua3 ti7關主尹喜遐。徐甲隨就趕到位,theh8出伊e5討債書,老子看了有淡薄仔受氣,就講,我m7是bat ka7你講過,你若tue3我到了安息國,就欲予你黃金tu2數,是你家己beh放棄--e5,而且,真早以前,我m7是bat予你吞一張符令,你m7才會當活到tsit陣,這嘛會用哩tu2數--e5-a。徐甲無接受tsit種講法,老子就叫徐甲ka7頭tam3 tam3,ti7徐甲e5 kha-tsiah-phiann 搭一下,徐甲隨就吐出一張e5符令,吐了後,徐甲隨時化作一堆e5白骨。
   
    尹喜看在眼內,知影老子是道行深高e5仙人,替徐甲求情講,伊願意替徐甲還這筆錢,求老子閣ka7徐甲救轉來。老子m7是真正欲予徐甲就按呢死--去,閣ka7彼張符仔化ti7白骨頂面,徐甲隨就閣回復倒轉來。

    徐甲theh了伊e5錢,回轉到中原,kah in某過著幸福美滿e5日子。尹喜嘛拜老子為師,ti7老子著作道德經e5期間,認真修練,最後嘛得了真道,隨老子成仙而去。

賣米者ê長生術

欲用聽--ê tshih遮→時間:5分58秒

    古早時代,有一e5賣米e5米商,叫做李玨(kak),伊是廣陵江陰人。厝裡代代攏是白米買賣e5米商。Ti7彼個時代,做生理e5人多數掠足大賺,也就是一般人所講e5無奸不成商。政府有規定買賣米e5斗仔愛仝款,m7管是糶(thiò)出抑是糴(tia̍h)入,攏愛用仝一e5斗仔,m7閣,政府e5規定無啥人遵守,猶原是糴入用大斗,糶出用小斗。李玨in tsit間khah無仝款,李玨e5老爸遵照政府e5規定買賣,顛倒予同行e5米商恥笑。尾--a,tsit間店交予李玨經營,李玨m̄-nā延用老爸e5用斗方式,而且m7管是糴入抑是糶出,盡量予人客家己量斗,所以利sun5比以早閣khah少,m7閣,薄利多銷,生理比以前閣khah好。伊tsit種做法予in老爸知影了,不但無ka7伊責罵,而且呵咾講李玨有道德。李玨一世人賣米,賣到了八十歲。M7閣ti7伊六十歲彼年,李玨遇到一e5道士,學了胎息之術,而且ka7名改做李寬。

     後來,官府來了一e5節度使,名嘛號做李玨,是一e5外放e5相爺。有一e5閒暗,節度使半暝做一e5夢,伊夢見家己到了一e5山洞,洞口e5花開真濟,景色真sui2,鳥隻嘛ti7洞口飛kuan5飛低,叫聲清脆婉轉,天頂e5彩雲飄飄,瑞氣萬千。行入洞內,亭台樓閣,邊a閣有一港清幽e5泉水。李玨想講,tsia 應該是仙人le tua3 e5所在無m7著。李玨si3 ke3 行行--le,伊看著一片石壁,頂kuan5刻真濟人名,忽然間,伊看著伊e5名李玨予人刻ti7頂面,伊真歡喜,想講:可能是伊tsit世人做宰相做了真濟德澤百姓e5代誌,上天有感應,才會ka7我e5名刻ti7 tsia,我已經會當做仙a。李玨愈想愈歡喜,tsit e5 時陣,有二e5仙童行ua2來,伊就問仙童講,石壁頂e5李玨是m7是就是伊,仙童講,he是江陰賣米e5李玨,m7是相爺你喔。

    透早一起--來,昨暝e5夢境猶歷歷在目,伊愈想愈奇怪,就派人去江陰找賣米e5李玨,m7閣賣米e5李玨早就改名作李寬啊,而且年歲大退隱真濟年啊,所以一時嘛問無李玨tsit e5人。節度使李玨並無死心,伊命令江陰e5縣官用心去找,尾--a,總是去予找著。李玨派了馬車去邀請伊來府裡,非常好禮來接待,李寬雖然老啊,嘴鬚白siak siak,m7閣精神猶原足好。李玨知影李寬是有道行e5人,所以以道兄來稱呼。幾工後,李玨將伊e5夢境講予李寬聽,而且向伊請教道法仙術,李寬講伊be7曉啥物仙術。經過再三e5了解,tsiah知影原來李寬做生理看輕利sun5,厚待人客,積了陰德,受到上天e5加封,tsiah會留名ti7仙洞e5石壁頂kuan5。

    李寬活到100歲,欲過身嘛無病無苦。過身e5第三工,伊e5家屬發現李寬e5棺木去予pit去,眾人掀開棺材,kan-tann7看著李寬e5衫褲niâ,李寬已經金蟬脫殼,升天而去--a。

2010年2月26日 星期五

瀏覽時可能tu2著e5一寡問題?

1.一半字仔羅馬字有亂碼e5問題:
    彼是因為你e5電腦無裝台灣羅馬字字型e5關係。
    Tshih8這e5連結會當下載Taigi Unicode字型。
    欲知影按怎安裝字型,請連結這e5網頁e5說明。
2.be7當聽聲音e5問題:
    可能是你e5瀏覽器是IE8,或者是其他e5問題。
    IE7以下e5版本無問題。

2010年2月23日 星期二

壽比南山

欲用聽--ê tshih遮→時間:5分54秒

    每一擺,咱欲ka7人祝壽e5時陣,攏會講一寡好聽話,上捷講e5可能就是壽比南山這句。到底壽比南山這句成語是按怎來--e5咧?下面欲講--e5就是這e5典故。

    古早時代,佇青卅有一e5衡王,這一工是伊e5五十歲生日,真濟賓客攏來ka7伊祝壽。衡王是一e5貪官,藉著生日,真濟人就愛來送禮,地方上e5人是敢怒不敢言。

    欲晝--a,人客kheh-kheh-kheh,其中大大方方行入一e5衣衫襤褸e5乞者,顧門e5掠準是衡王交結e5奇人朋友,m7敢ka7擋。乞者e5出現,予衡王感覺真無歡喜,佇眾人e5面前又閣m7敢發作。伊看彼e5乞者端坐佇一邊,也無表示祝壽e5意思,就暗示管家去ka7乞者討禮數。乞者ui3 破衫枝 thiah 一塊破布,un3著碗--裡e5酒,向南爿e5天頂畫了幾畫,大聲就講:草民ka7衡王拜壽了,請衡王行出門外,接受草民e5賀禮。

    衡王kah眾賓客行出大門,向南山頂懸一下看,一字金sih sih e5”壽”字出現佇南山頂e5半空中。眾人齊聲喊講”壽比南山”,衡王想講是tu2著仙人a,tu2欲過去ka7伊施禮拜見,卻是這時陣e5乞者m7知走去叨位a。

    人客中間有一e5才高八斗e5文士,突然間講:tu2 tsiah彼e5人一定是八仙之一e5呂洞賓,這時陣,有人發現彼字”壽”字e5內面e5”寸”欠了一點,若按呢,衡王e5壽數敢會是有不足e5所在?衡王一聽,趕緊叫人去ka7呂洞賓jiok轉--來,懇請伊閣再佇壽字頂懸加添一點。呂洞賓目睭kheh kheh,口中唸唸有詞,指頭仔一比,就聽著khiang一聲,彼字壽--字e5一點已經添--起哩a。

    衡王對呂洞賓千恩萬謝,招呼眾人閣再入大廳繼續宴席。衡王入座了後,遂感覺怪怪,大廳--裡假若失落了啥物物件,又閣不便詢問。宴席欲suah e5時,管家e5 雄雄狂狂走來衡王e5耳孔邊,tshi-tshi-tshuh-tshuh講了幾句話,衡王聽了面色大變。原來,管家發現tu2 tsiah登記好,khng3佇庫房e5壽禮,全部攏無--去a。

    這時陣,夫人e5女婢嘛走--過來,講夫人e5金銀首飾攏無--去a,這時陣e5衡王嘛無顧著在座e5親朋好友,起身入去內院查看,m7 na7祝壽e5賀禮kah夫人e5首飾無--去,tsham金庫內底e5金銀財寶嘛攏空空空,也就是講,所有e5錢財完全空a。

    貪財成性e5衡王,看一e5煞gang7去,一口氣喘be7起--來,一tah久nia5,就倒地不起,一命嗚呼哀哉,喜宴遂變做喪宴。

    原來,彼字壽--裡e5一點,就是用衡王厝--裡e5所有金銀財寶點--起哩e5,表示呂洞賓欲予衡王e5貪婪一e5教示,沒想到衡王享受了最後e5一點壽,遂一命嗚呼。

    Ui3彼陣開始,呂洞賓用仙術所寫e5壽字就開始流傳a,漸漸--e5,壽比南山就變成做生日祝壽e5一句祝福語,流傳到tann。

    現此時e5做生日,少年人卡無禁忌,老一輩--e5嘛有人無愛予人做生日,驚講若德行無到遐,做大生日顛倒會tshik著歲壽。

呆若木雞ê故事

欲用聽--ê tshih遮→時間:3分54秒

    Ti7古早春秋e5時代,有一e5真gau5訓練相拍雞e5人,叫做紀省子。彼e5時代時行"鬥相拍雞"做娛樂。齊宣王愛sng2鬥相拍雞,就請紀省子為宮廷訓練相拍雞。

    過了十工,齊宣王問講:「相拍雞訓練了按怎?」紀省子講:「Tsit隻雞雖罔勇健好鬥,m7閣虛浮急躁,驕傲e5心性猶未去除--leh。」

    閣過了十工了後,齊宣王問講:「相拍雞訓練了按怎?」紀省子講:「Tsit隻雞猶無夠鎮定,聽著聲就叫,看著影就跳。」

    一個月過去--a,齊宣王be7堪得等,問講:「敢猶未訓練好?」紀省子講:「猶閣未使--得,伊e5氣勢siunn tshia-iann7,外在e5焰氣siunn強。」

    十工後,紀省子抱著彼隻相拍雞來見齊宣王,秉告齊宣王講:「相拍雞訓練好--a,請陛下驗收。」講煞,隨將彼隻相拍雞放--出來,欲kah別隻來比看覓。齊宣王一下看,彼隻雞m7-na7體格無夠粗勇,嘛無敏捷liu2-liah e5動作,一隻戇戇khia7 ti7遐,假若是一隻柴刻e5柴雞--咧。M7閣,別隻雞,看著tsit隻雞按呢,遂驚kah走咧long7,m7敢ua2去伊e5邊--a。

    有一句成語講:呆若木雞,典故就是ui3 tsit e5故事來--e5。

    Tsit e5故事,主要是欲講道家「無為」e5思想,嘛是咧講道家修練e5內涵「性命雙修」。啥物是性命雙修呢?性是內在,就是咱e5自性,自性是本自具在,但是需要悟徹kah修練,內功無修,空有外功,終不可得。只有加強內外e5修為,自性kah形體作伙修煉,內外兼備,tsiah會當達到登峰造極e5境界。清靜章所講--e5,大成若缺,大盈若沖,大直若屈,大巧若拙,大辯若訥,正是此義。

比干剖心肝

欲用聽--ê tshih遮→時間:6分55秒

    古早古早,ti7商朝e5時代,最後一e5國王號做紂王,咱攏知影,紂王無道,為非亂作,是一e5臭名萬世e5暴君。當時e5紂王昏庸無能,將九尾狐狸精所變e5妲己納入後宮,成作紂王e5愛妃,更加喪德敗行,荒淫無道。另外,紂王重用奸臣費仲kah尤渾,致使朝綱敗壞。

    比干是商紂王e5丞相,嘛是紂王e5阿叔。伊為人正直,處處以國家朝廷為重,時常苦勸紂王就愛遠離美色,清除奸臣,整頓朝綱。為此,妲己等將比干當做是心中石、眼中釘。

    這一工,妲己愁容滿面。紂王非常關切,問講:是to2位無tu2好?妲己m7講,干若流目屎,紂王更加煩惱,一再催問,妲己tsiah講:「妾身紅顏薄命,自細漢致著心疼之病,若發作起來,是痛疼難當,這擺,可能難關be7得過,欲kah大王永別--a!」紂王著急問講:敢無解救e5辦法?「縱然有,大王嘛會m7甘」妲己以退為進。「你盡量講看覓!」紂王非常著急。妲己tsiah講:「我細漢e5時,bat予天神救助過,用玲瓏心肝一片,煮湯食--落去,病就會好--a。」

    紂王派人四界走tshue7有玲瓏心肝e5人,一直tshue7攏無。這一天,二位奸臣來稟報:「陛下,臣等全國走透透,干若tshue7著一e5人有玲瓏心肝。」紂王講:「也m7緊掠--來,通予娘娘治病?」二位奸臣講:「微臣,m7敢!」紂王感覺真奇怪:「朕乃是一國之尊,有啥人通好懼怕?」二位奸臣tsiah講:只有親像比干按呢e5人,有道有德,忠心耿耿,tsiah有一付玲瓏e5心肝。其他攏tshue7無--a。紂王隨派使者,去說服比干,講明因果,希望比干會當以大義為重,獻出心肝,替妲己娘娘治病。

    比干知影這是妲己一干人欲來陷害伊。在此之前,神人姜子牙bat予伊一e5錦囊妙計。使者走了後,伊將錦囊拍開,內面寫講:你會有剖腹取心之大難,內面一張符仔,將伊燒ti7水碗--裡,啉了後,會當暫時保護五臟六腑。你剖腹挖心了後,緊離開朝閣,ti7大街裡,你會tu2著一e5賣無心菜e5人,你就ka7問講,人若無心甘閣會活?伊若應講,人無心欲哪會活,你就穩死--a,伊若應講,無心菜無心就會活,人無心哪會be7活!按呢你就be7死。

    比干啉了符仔水,來到朝閣,手指妲己大罵:你這e5禍國殃民e5賤人,我死ti7你e5手頭,實在有愧於先帝。罵了閣罵紂王:成湯二十八世,斷送ti7你e5手中,非是臣下之不忠!講煞,抽出短刀,剖開家己e5腹肚,申手將心肝挽--落來tan3 ti7塗下,轉身,騎上馬隻,向朝閣響響而出。比干來到街市,na2行na2將身上e5錢財,tan3予khah散赤e5人,尾--a,真正tu2著一e5婦人人大聲leh叫賣無心菜,伊隨停馬,問講:菜無心會活,ah人無心敢會活?婦人人應講:人無心欲哪會活!比干--一下聽煞,大叫一聲,馬上ui3馬頂puah8落馬腳,一命嗚呼!

    比干死了後,昇天作神,也就是現此時,咱民間所崇拜e5文財神。

元神出竅李鐵拐

欲用聽--ê tshih遮→時間:6分19秒

    古早古早e5中國,有一e5式族部落e5頭人叫古神氏,伊有修練神仙之法,漢草閣好,伊有一台車,是用六隻生翅e5獨角羊仔來拖車,伊用tsit隻車巡視天下,所到之處,百姓攏真信服--伊。

    古神式活到三百幾歲,感覺家己e5修行無閣進步,所以伊就去拜老子為師,老子將道法傳予--伊,伊尾仔改名作李凝陽,就來到現此時安徽e5碭山隱居修練。

    這一工,李凝陽接著老子e5請帖,邀請伊做伙去遊華山,欲出門e5時陣,伊交代一e5新來e5徒弟:我今仔日欲施展元神出竅e5大法kah我e5師父出遊,假使ti7七工內,我e5元神無倒轉--來,你就將我e5肉體焚化掉。

    Ti7道家e5修行大法中,元神出竅是一e5大法術。人e5魂是tua3 ti7肺--裡,魄是tua3 ti7肝--裡,魂若出竅,魄就愛顧ti7肉體,假使七工內魂無倒轉來肉體,肉體就開始腐爛,就愛將肉體火化,予魄會當tue3魂去。

    交代完,李凝陽就離開--去,去kah老子遊山玩水囉。新來e5徒弟,顧ti7師父e5軀體邊仔,一時仔就m7敢離開。到了第二工,徒弟e5阿兄,ui3山腳來到山頂揣--伊,講老母破病真沉重,叫小弟緊落山見母親一面。Tsit e5徒弟十分為難,師父e5軀體愛看顧,老母e5病重,嘛be7當無轉--去。最後,伊選擇先轉去厝--裡見老母e5最後一面,才閣拍算。

    徒弟e5厝就ti7山腳,見了母親,盡了孝道,m7敢siunn延tshian5,趕緊閣趕轉來山頂看顧師父e5軀體。M7閣害--啊,師父e5軀體已經去予虎食--去啊,kan-na7 tshun一堆e5殘骨nia5。徒弟非常傷心,只好ka7師父e5屍骨埋葬。

    第七工,李凝陽e5元神轉--來啊,suah揣無軀殼通好活--起來,伊屈指一算,發現伊e5軀體已經去予虎食--去,正是老子ti7欲離開e5時,送伊e5一句話:「欲得舊形骸,正逢新面目。」

    李凝陽e5元神四界漂流,來到一e5山腳,發現一e5 tu2好餓--死e5屍體,伊就跳入去tsit e5軀殼--裡,欲來借屍還魂,伊跳--入去了後,tsit e5餓--死e5人,連鞭就活--起來啊。李凝陽tsit8-e7 peh--起來,才發現tsit e5人原本是一e5 pai2跤--e5。伊來到溪水邊,欲看水影內底e5人生做啥款,tsit8-e7看,thah會tsiah bai2?伊theh8出老子予伊e5仙丹,吞食--落,看會當變轉去原來e5形體be7,結果嘛無效。這時,有人ti7咧吟詩唸講:「草脊茅簷,窗毀柱折,斯室甚陋,何喜獲豐收寄寓!」李凝陽回頭一看,原來是師父老子。老子講:修道人看重e5是心性修持,哪著計較軀體e5 sui2-bai2咧?李凝陽聽師父按呢講,也就接受囉,臨別,老子閣送伊一枝金箍kah一枝鐵拐,金箍通好绑頭毛,鐵拐通好幫助行路。

    從此,李凝陽孤身一人,以乞食e5形象四界遊歷。伊身phainn7一e5葫蘆,四界行醫,幫贊貧困,勸化世人,也就是後來e5人所稱呼e5八仙之一─李鐵拐e5由來。

正陽帝君鍾離權

欲用聽--ê tshih遮→時間:4分1秒

    Ti7 古早e5中國漢朝e5時代,有一e5將軍,叫做鍾離章。伊有一e5後生,叫做鍾離權,鍾離權m7是普通人,是古早e5仙人來轉世--e5,因為鍾離權出世七工內攏be7食奶,嘛be7哭,予鍾離章翁某非常著急,到了第七工,鍾離權忽然間開嘴講話--啊,伊講伊去一e5有寫「玉京」e5所在tshit-tho5,tsiah e5話一講煞,街頭巷尾就han2講鍾離章in 兜出世一e5神童。
   
    鍾離權漢草be7-bai2,朝廷命伊帶軍防守北方進犯e5胡人,m7閣鍾離權m7是將軍命,一出征就失敗。到了西晉時期,伊又閣被朝廷重用,tshua7兵攻打西爿e5吐蕃,沒想著又閣大敗而歸。經過二次e5戰敗,鍾離權心灰意冷,從此隱遁山林,無欲閣tshap人間世事。鍾離權本來就是仙人轉世,所以真緊就頓悟大道真理,無偌久,就tu2著東華帝君傳授伊赤符玉篆、金科靈文、大丹秘訣、周天火候kah青龍劍法,又閣tu2著華陽真人來助伊修練,所以真緊就修煉成功,成作一e5會當tsiunn7天,抑會當下凡e5人間仙人。
   
    鍾離權是道教傳說中e5八仙之一,也是道教北五祖之一,全真教派尊稱伊是「正陽祖師」、「正陽帝君」。鍾離權e5畫像通常是袒胸露腹,大目睭,面色紅霓,手夯葵扇。神態自若,豁達自在。鍾離權捌ti7長安e5酒樓e5壁頂題三首詩:
其一:坐臥常攜酒一壺,不教雙眼識皇都。乾坤許大無名姓,疏散人間一丈夫。
其二:得道真仙不易逢,幾時歸去願相從。古言住處連滄海,別是蓬萊第一峰。
其三:莫厭追歡笑語頻,尋思離亂可傷神。閑來屈指從頭數,待到清平有凡人。
   
    鍾離權姓鍾離,名權,字雲房,又字寂道,號正陽子,又號和穀子,漢朝人。但是嘛有人講伊是五代、宋初e5人。

呂洞賓ê考驗

欲用聽--ê tshih遮→時間:6分12秒

    呂洞賓生ti7富貴e5官宦人家,少年真gau5做生理,所以生活也真富裕,m7閣呂洞賓品性溫良,樂善好施,真受人e5尊敬。呂洞賓到了64歲tsiah考著進士,m7閣伊並無興趣做官。
    這一年,呂洞賓遊歷來到長安城,ti7一間旅店tu2著鍾離權,鍾離權感覺這e5人有仙緣,想欲渡伊做仙,呂洞賓是有大智慧e5人,談話中就知影鍾離權m7是泛泛之輩,一心就拜在鍾離權e5門下,想欲tue3伊修行而去。鍾離權刁故意為難--伊,講你e5意志猶未堅定,仙骨猶未大到在,想欲學道,猶閣愛等幾若世人e5輪迴。呂洞賓聽了遮e5話,並無喪氣,顛倒是辭官歸田,專心學道修練。
   
    有一擺,伊kah一陣朋友出外遊歷,來到荒郊野外,突然間竄出一隻猛虎,逐家攏真著驚,這時陣e5呂洞賓顛倒非常鎮靜,雙手ka7彼隻虎tsah--leh,叫其他e5人攏閃走,家己一e5欲犧牲飼虎來救其他e5人,講來嘛奇怪,這時陣e5虎煞變做非常溫順平靜,閃過這陣人,向邊仔e5方向離開而去,逐e5人這時陣攏真欽佩呂洞賓e5情義。
   
    這一工,呂洞賓e5長工ti7田園種作,無意間掘著一甕e5珠寶箱,隨時報予呂洞賓知影,呂洞賓ka7伊e5長工講:m7是咱努力得來e5財富,m7通占有,猶是ka7伊khng3轉去原來e5所在khah好。伊e5長工只好閣將遐e5珠寶原封不動ka7 tai5轉去,第二工,伊e5長工be7放心,閣去巡一擺,m7閣khah揣就揣無彼e5 tai5珠寶e5所在,嘛揣無鋤頭掘過e5痕跡。
   
    閣有一擺,呂洞賓kah伊e5下kha手人去市場買物件,ti7市場煞予人誤會認作賊仔,一寡錢攏去予人搶搶去。物件無買kah半項就倒轉去厝--裡。夫人問伊哪會空手而回--leh,呂洞賓煞講:錢ti7半路仔去予phang3-kian3去。伊ti7市場予人冤枉搶錢e5代誌,一句都無講。
   
    有一工,夫人倒轉去後頭厝,真tu2好,這一冥來了一e5媠姑娘,講是路頭無方便,想欲借tua3一冥,呂洞賓真好禮ka7伊安tah ti7客房,欲離開e5時,這e5姑娘煞舉止輕浮,對呂洞賓khiu2-khiu2-lak8-lak8,m7閣呂洞賓m7是彼款好色之徒,不但無接受,而且對這e5姑娘嚴正說教,如此這般。
   
    這四件代誌,其實攏是鍾離權leh對呂洞賓e5考驗。鍾離權非常歡喜,再次下凡現蹤,伊對呂洞賓講:世間e5人,個個被緣塵蒙蔽,be7得跳脫貪嗔癡愛e5種種束縛。你想欲拜我為師,我更加想欲走揣值得傳授e5徒弟。既然你已經通過我e5考驗,為師我非常歡喜,欲閣教你一e5點金之術,通好用來救濟世人,造福眾生。等你三千功八百果若圓滿,我tsiah閣來渡你為仙,你看按怎?呂洞賓俯首稱謝,問講:點金之術所變出來e5黃金,敢永遠攏be7閣變?鍾離權應講:三千年了後,會閣變回原來e5模樣。呂洞賓再次拜謝:如此看來,弟子m7敢領受這e5法術,免得害了三千年後e5人,這種點金之術,有不如無。
   
    鍾離權聽了非常讚嘆,答應傾全力幫贊呂洞賓修練,呂洞賓也因此修成了正果,成作如今家喻戶曉e5一个得道仙人。

文昌帝君ê故事

    Ti7中國宋朝時代,有一e5大文學家,叫做蘇洵,有一暝,伊夢著一e5高人,自稱是張亞子,手theh8一付弓箭,對著天頂連射二箭。蘇洵m7知啥物意思,恭敬問伊原由。M7閣張亞子無講kah半句話,隨就隱身而去。過了無偌久,蘇夫人就連sua3生了二e5後生蘇軾kah蘇轍,二e5後生大漢了後,仝一年參加科舉考試,雙雙考tiau5進士,連同蘇洵三e5人,一門三進士,一時轟動了朝野上下,嘛是歷史上e5一个美談。

    Ti7古早e5社會,m7管是在朝e5文武百官,抑是社會上e5富商仕紳,攏是天頂e5星宿下凡轉世而來--e5。M7閣,天頂e5星宿若欲下凡到人間,必須經過天門這一關,管理天門e5正是天狗星。天狗星本底是天門e5守衛而已,地位卑微,m7閣隨著天星下凡e5眾星宿愈來愈濟,天狗星煞愈來愈hiau5-pai,處處刁難,甚至予已經下凡e5星宿ti7凡間be7當發揮,成做一e5默默無聞e5凡夫而已。
    天狗星e5行為,予凡間望子成龍e5父母非常e5不滿。星相學家只好ti7天狗星e5頭殼頂,tshue7一粒比天狗星閣khah光e5天星,號名作弧矢星,意思是欲予天狗星一e5警告,m7通閣再為難天頂文武眾星宿e5下凡。M7閣,天狗星hiau5-pai慣習,煞 m7驚弧矢星e5警示,猶原是積習難改,無視弧矢星e5存在。

    凡間e5人,愈來愈袂當忍受,紛紛請求玉帝做主,要求撤換天狗星。玉帝知影了後,也非常震怒,命令派駐凡間e5梓潼神張亞子處理這件代誌。梓潼神是專門掌管凡間文人e5功名利祿,凡間人稱呼做文神。梓潼神張亞子忍無可忍,只好theh8出伊e5射天本領,ti7一e5暗暝,開二箭,將彼e5 hiau5-pai e5天狗星解決tan3掉。

    蘇洵回想起十外冬前e5彼場夢境,tsiah知影原來張亞子就是梓潼神,伊射e5 he二箭,就是欲予伊二个後生e5二箭。其實,是tu2好天庭欲派二个文曲星下凡,tu2著張亞子射死天狗星,這一幕去予蘇洵e5夢境tu2--著,順tsit e5勢,m7 tsiah會二个文曲星攏降生ti7蘇洵in兜,真正是千載難逢e5巧合啦。

    張亞子thai5死天狗星,玉帝一點仔都無受氣,顛倒將伊召回天庭,加封伊做祿神。祿神就是祿星,位置ti7北斗七星e5正對面。所以,文星嘛是祿星,也就是文昌帝君,文昌帝君e5邊a,有二个童子服伺,一个是臭耳聾,一个是啞kau2,俗稱是天聾kah地啞。是按怎哪會派天聾kah地啞服伺文昌帝君--leh?因為文昌帝君就是文武百官朝廷考試e5主考官,考題是袂當洩漏--e5。到kah現在,真濟學生欲考試,嘛攏會來到文昌帝君e5神尊面前,恭請帝君加持kah保庇,予考生會當成功順利。

老子kah常樅ê故事

    《說苑》是中國漢朝時代劉向所著e5一本冊,內底有記載一e5故事。故事講:常樅是老子e5老師,常樅已經老--a,而且又閣破病kah真傷重,老子非常著急,趕去探望伊e5恩師。老子想講恩師這擺病kah tsiah傷重,m7知有啥物通好傳予後世e5修行真言欲交代--e5?常樅就講,免你開喙,我嘛欲交代一寡話予你。我先問你一个問題,你敢知影是按怎子路經過伊e5故鄉e5時陣,無欲坐馬車,欲落來用行--e5?老子應講,這是子路咧提醒家己m7通忘本。老師真滿意,繼續問講,有德行e5人,若tu2著大樹,攏會向前ka7大樹行禮致意,這是啥物意思?老子回答:大樹e5年歲比咱khah大,咱愛會曉尊重老大人。常樅真歡喜,ka7伊e5喙開開,問老子講:我已經tsiah老--a,又閣定定破病,你看我e5喙舌猶有ti7--咧無?老子回答:有啊,原本好好。常樅閣問講:啊我e5喙齒--咧?老子看看咧講:你e5喙齒攏落了了--a。常樅追問,哪會按呢?老子想想咧講,喙舌khah柔軟,所以會當生存khah久,喙齒會落了了,是因為伊ting7-khok-khok,所以khah be7久長。常樅聽了後,會心而笑講,我欲交代e5話,你攏了解--a。這就是後來e5人所定定講e5「舌存齒亡」e5典故kah意涵。

    老子道德經第八章講,上善若水,水善利萬物而不爭。就是講,上介有智慧e5人,為人處世假若像水hiah呢柔軟,因為水是柔軟--e5,所以閣khah剛強e5刀槍嘛無法度ka7水切斷,華語講「抽刀斷水水更流」。啊若nge7-tu2-nge7 e5刀仔相刣,一定是非你死便我亡,這m7是道家e5處事思維。水善利萬物而不爭,就是講,水會當滋養萬物,你看地球上e5生物,佗一種會當無水閣有法度生存--e5?水會當利益眾生,m7閣攏be7邀功,上介謙虛,定定處ti7上介ke7 e5所在。「處眾人之所惡」,就是眾人無愛e5所在,眾人無愛e5處境,水攏無嫌bai2,這也就是道家為人處事e5最高境界。有人會誤解柔軟就是柔弱,其實m7是,柔軟是一種對道e5體用,是處事e5態度,表面上,假若真虛弱,事實上,柔中帶有真強,也就是「以柔克剛」e5真實剛強。有道行e5人,注重內聖e5剛強,無道行e5人kan-na7看著表象而已。

    修道講來嘛真簡單,凡是社會一般人e5價值觀,多數是背道而行--e5。社會人o-lo2人「巧」,徛ti7道e5立場,「巧」指e5是奸巧。畢竟,大智若愚,大巧若拙,才是老子教予咱e5正確人生觀。

黃粱一夢

欲用聽--ê tshih遮→時間:7分9秒

    佇中國ê歷史上,有三个足有名ê「夢」ê故事,一个是莊周ê蝴蝶夢,一个是淳于棼ê南柯夢,另外一个是下面欲來講ê邯鄲一夢,又號做黃梁一夢。

    唐朝時代,有一个書生,姓盧,生活困苦,閣考運無好,每一擺tsiūnn京考試,就攏名落孫山。古早,一般人若欲功成名就,多數愛參加鄉試,取得秀才ê身分,毋閣秀才無地位,就愛經過京試,取得全國考試ê前三名,號做狀元、探花kah榜眼,tsiah有大官通做。

    這一年,盧生又閣欲tsiūnn京趕考,這一工來到邯鄲城,天亦欲暗--á,就凊彩揣一間客棧tuà--落來,噃咐店家傳暗頓,客棧閣有另外一个人客tī遐歇睏,店頭家就替怹兩个無閒暗頓。盧生一路風塵僕僕,坐tī撐椅--裡,一下thiám,真緊就睏去--á。

    隔工ê透早,盧生就一路趕來到京城,參加考試。這一擺,伊真幸運,考著了狀元。無偌久,盧生就tī京城做了大官,閣起一間真sù-sī ê狀元府,而且,嘛娶了皇上ê查某囝,做起了駙馬爺,第二年,生了一个後生,會使講是飛黃騰達,不可一世。

    這一年,北爿ê胡人時常侵入地界,擾亂百姓。皇帝命令伊tshuā兵五萬去攻打胡人,無偌久ê時間,盧生就將胡人拍敗,凱旋而歸。京城ê百姓,張燈結綵,拍鑼lòng鼓,弄獅kah弄龍來kā迎接,盧生胸坎結一蕊大紅花,騎著一隻大馬響響而來,沿路ê百姓,kā鮮花擲tī馬前,一路處處都是花芳,盧生意氣風發,神采飛揚。

    皇上賜予盧生大遍ê土地kah田園,無幾年ê時間,盧生就已經家產萬貫,非常好額。伊ê官運亨通,一路升官做到宰相ê大位,官位之大可是一人之下,萬人之上。這幾年,公主嘛替伊生了幾若个囝兒,其樂融融。人生到此,夫復何求?

    常言道:月盈則虧,水滿則溢。正當盧生飛黃騰達之際,朝廷卻發生了內亂,皇上予人掠去軟禁,身為前朝重臣ê盧生嘛袂當安然無事,伊ê家產予人充公,奴婢囝兒予人掠去充軍,公主去予亂軍刣死。盧生一夜之間,uì朝廷大臣,變作平民百姓,伊流離失所,乞食為生。

    寒天到--啊,盧生身穿薄衫,寒kah khū-khū-tsun,伊來到一个大戶人ê大門口,想欲入去bih一下啊風雪,毋過suah予顧門ê人戽--出來。伊實在tsì-tsài袂tiâu,一下無好勢,puah8倒tī土腳兜。伊唉唷一聲,遂uì夢境裡醒--過來。

    盧生四界一看,eh!這敢毋是客棧,伊一个人倒tī椅條頂懸,仝房ê人客閣掠伊金金看,原來拄才ê情景攏是一場夢。這時陣,店頭家ê黃米飯猶未煮熟,仝房ê人客嘛猶咧等候。伊看盧生醒--起來,開喙講:你拄才做ê夢,浮浮沉沉,人ê一生短短幾十年,你一搭久啊就kā夢煞--啊。人ê一生就假若是眠夢仝款,榮華富貴原來嘛是一場空,何必著苦苦追求咧?

    盧生聽了大驚,問講:你哪會知影我拄才做一个夢?彼个人應講:在下魯鈍,毋閣捌一寡練丹之術,人生如夢,我看你雖是一表人才,毋閣猶是隨我入山修練好--無?

    原來,這个人就是呂洞賓,伊看盧生有仙緣之骨,特別施法欲來渡伊--ê。盧生經過拄才彼場夢,才大徹大悟,隨著呂洞賓修道而去。

庭前生瑞草,好事不如無

    昔時賢文內底有一句詩句講:庭前生瑞草,好事不如無。真濟人毋知影這是啥物意思,下面就欲來講這个故事。

    瑞草是一種真特別ê花。好事是講tsit欉瑞草花,香有七里路,而且這欉瑞草花特別卡美。因為這欉瑞草花特別無仝款,所以厝頭家就用籬笆kā圍--起來,欲看瑞草花ê人,就愛phah票才會當看。消息傳--出去,欲看瑞草花ê人是挨挨陣陣,逐家都想欲來看,he香有七里路,干焦鼻著香,無看見花蕊ê人攏足想欲來看--一下。因為按呢,厝頭家忽然間就賺了真濟錢。

    佇幾若冬前,有一个阿伯--á,伊有一个後生,出門去某一个縣咧做生理,開始ê頭幾年,攏有咧寫批,書信來往,尾--á這幾年,煞無消無息,阿伯--á足數唸伊ê後生,就起身欲來去揣伊ê後生,拄好行到這ê庄頭,聽人講有一欉瑞草花真香真美,阿伯--á嘛拍了門票,欲入來kā看覓。Siáng(啥人)知影阿伯--á看了這欉瑞草花了後,煞見景傷情,流下了傷心ê目屎,因為伊ê後生,名嘛號作瑞草,這欉瑞草花這香這媠,予伊想著伊ê後生,攏無消無息,人毋知佇叨位。阿伯--á ê目屎一滴一滴,滴落瑞草花ê頂懸,才一搭久niâ,彼欉瑞草花煞就按呢lian--去啊。這時陣,顧花ê主人真無歡喜,大聲喊講:「我這欉花這香這媠,人是相爭欲來看,你卻是佇遮哭,哭一ê害我ê花煞謝謝lian lian--去」伊真毋願,一定欲叫阿伯--á賠錢,毋閣阿伯--á講伊是一ê出外人,嘛無什麼錢通賠伊。主人家就按呢kā阿伯--á送去官府,欲予官府來辦理。去到縣官遐,縣官問阿伯--á講:阿伯--á你哪會遮愛哭,人he瑞草花開kah媠媠,哪有什麼好哭--咧,hânn?阿伯--á吐一ê大氣,就講:大人啊,你就愛同情--我,我有一ê後生,伊ê名嘛號作瑞草,出門去外縣市做生理,已經幾若年攏無消息啊,我就是欲來去揣我ê後生,經過這ê庄頭,聽人講,這个所在有一欉真香真媠ê瑞草花,我就按呢入來kā看覓,無想著講,一下入--來,看著遮爾媠ê花,煞見景傷情,忍不住流落了傷心ê目屎,我毋是刁持ê啦。這个時陣,縣官想想--咧,就tshuā人來到主人怹兜,kā伊ê部下講:來--啊,去kā彼欉瑞草花挖--起來,看塗跤底有什麼物件。結果,花欉下跤是一个已經thūn掉ê古井。縣官叫人繼續kā挖--落去,liú一二丈了後,才發見一具人ê死體,拖--起來一下看,死體閣無爛去。縣官就叫阿伯--á來看覓,阿伯--á一下看,就大聲號,講:大人啊,伊就是我ê後生瑞草啦!縣官辦到這,隨喊講:升堂!對主人kā掠--起來,也順紲kā厝邊頭尾ê人攏kā調uá--來。縣官就問厝邊隔壁ê人講:這个人過去是咧做什麼頭路--ê?逐家都講:伊卡早都咧kâng剃頭,開剃頭店啦。幾若年前,剃頭店就無開啊啦。這ê時陣,縣官就問頭家講:你開剃頭店都好好,是按怎欲關店,是按怎欲kā這ê井thūn--起來?即時陣ê厝頭家就著驚--啊,inn-inn ònn-ònn,會講嘛袂完全啊。縣官追問講:這个人死佇你ê古井底,是毋是你kā害--死ê?若無,哪會死佇你ê古井底?這个厝頭家,最後才承認講人是伊刣--ê,伊講:幾若年前ê有一天,天落大雨,店--裡無人客,tú好有一个少年--ê擔著一擔布,看--起來假若真重ê款,我臆內面一定囥真濟銀兩。我頭ná剃,ná探聽伊ê底細,知影伊是一个趁著錢ê生理人了後,我就起了貪念,外口雨落這大,也無其他ê人客,我就趁kā伊修面ê時陣,用剃頭刀uì伊ê am-á-kún就kā liô--落去。這个人客死了後,我就kā伊ê死體擲落去古井底,閣kā古井thūn--起來,血水攏洗乎清氣。uì彼工開始,我就kā店關--起來,無閣再剃頭啊。最近,我發現原來古井ê所在生一欉花,這欉花嘛毋知哪會這媠這香,我就凊綵kā號做瑞草花,哪會知影代誌會變kah按呢!

    當然,尾--啊,這个刣人ê頭家一定愛受著國法ê制裁。這就是「庭前生瑞草,好事不如無」ê典故。

何仙姑傳奇

        佇道教傳說ê八仙之中,何仙姑是唯一ê一名女仙人,關--係何仙姑ê傳說有真濟,一種講法是講何仙姑原本姓趙,因為手theh8荷花,荷kah何仝音,後來ê人就叫伊是何仙姑。毋管佗一種講法,仝款--ê是何仙姑是出世佇唐朝時代ê人,下面就來講這个故事。

        現此時ê河南,瀟湘二水會合ê所在,古早號做零陵,傳說上古時代ê舜帝就是埋葬佇零陵ê九巍山。零陵ê西爿有一座盛產雲母石ê雲母山,山中一條清澈ê小溪,是為雲母溪。溪邊tuà了幾若戶ê農家,某一工,佇田--裡做穡ê人,看著何--家ê厝頂懸籠罩著一層真媠ê紫氣,一群ê仙鶴佇紫氣ê四khoo圍,飛來飛去。一隻花鹿仔āinn著一个穿紅衫ê查某囡仔,一直uì何--家走--入去,彼下晡,何--家真正生落了一个查某囡仔,號名做何瓊。

        莊--裡ê人攏認為何瓊是仙人來轉世--ê,毋過孩童時代ê何瓊kah其他ê囡仔並無啥物無仝,仝款是愛哭閣愛tshit-thô,不二過,何瓊漸漸大漢,嘛愈來愈乖巧,毋nā會讀冊,閣會kā父母鬥做khang-khuè。

        十三歲彼年ê有一工,何瓊kah著仝伴--ê去山頂挽茶,一下失注意,煞kah仝伴--ê走散去,一ê人佇山頂揣無路通轉--來,過了一暝一日,伊又閣寒又閣iau,坐佇大石頭頂,起聲大號--起來。這个時陣,拄好呂洞賓下凡經過遮,伊送一粒仙桃予何瓊食,而且報伊轉去ê路,離開ê時,交代伊愛定定來這ê所在,講伊有仙緣,欲教伊修道之法。

        何瓊照著呂洞賓ê指示,真緊就轉來到厝,彼一暝,何瓊做了一个夢,夢見有仙人教伊食雲母粉ê方法,食了雲母粉會當身輕如燕,展翅而飛。第二工,何瓊依照仙人ê指示,來到雲母山,採食雲母粉,食了後,照著仙人ê方法練飛,果然,伊會當親像鳥仔仝款,佇天頂飛來飛去,伊非常ê歡喜。

        從此以後,何瓊ê言行舉止漸漸神秘,伊定定去真遠ê所在採集奇珍異果轉來孝敬厝--裡ê序大人,嘛時常採集藥草轉來予莊--裡ê人治病,有時陣就佇山頂隨著呂洞賓修練道術。除此以外,何瓊閣會替人預測人事未來,當地人攏稱呼伊是何仙姑。

        消息真緊就傳到長安城,這時陣正是大周武則天ê時代,武則天派人賜伊一su朝霞服,何瓊穿了朝霞服,仙氣非凡,附近ê人e-e-陣-陣,攏欲來頂禮kah膜拜。嘛有人想欲來講親情,毋過這時陣ê何仙姑已經漸漸脫離凡塵,伊無想欲嫁--人,歸工毋是入山修道就是挽藥草為人治病,自得其樂。

        這一年,武則天派人邀請何仙姑進宮,談論長生之術。何仙姑苦勸武則天,身為一國之君,愛多行善事,積德修福,更愛以蒼生百姓為念,施行仁政,以民為本。武則天雖然本性難改,毋過,伊uân-nā尊重仙姑ê開示,做了袂少ê改革。

       二十六歲彼年,何仙姑修行圓滿,佇零陵ê鳳凰台,隨著前來渡化ê李鐵拐升天而去。

神機妙算黃妙應

        佇勘輿學(kham ú hak8)內底,講究ê是天時、地利kah人和ê配合。三國時代,曹操會當雄霸北魏,是因為得著天時,東吳孫權會當獨霸江東,是因為得著地利,若劉備會當得荊州而不敗,是因為得人和。漢朝末年ê三國鼎立,就是因為勘輿學所講ê這三項要素,分別予三个國主得著,而且勢均力敵,歷史上才會出現這个有名ê朝代。

        唐朝ê末年,出世一个真出名ê地理師,叫做黃妙應,又名涅槃和尚、慧日禪師,相傳是福建泉州蒲田人。黃妙應是一个出家人,毋過真奇怪,伊剃度了後無欲穿袈裟,不受具足戒。佇閩南一帶為人看風水,定定都出語成讖,歷歷如卷,妙奪天工。涅槃和尚兼具禪師kah風水師ê雙重身份,是佛教本土化、世俗化,並且kah民間信仰漸趨融合ê典型人物。

        黃妙應一出世就無老父啊,而且一出世就得著軟骨症,二、三歲啊猶袂曉行路,嘛袂曉徛。伊ê老母無法度,將伊寄飼佇一間廟寺。黃妙應逐工佇廟寺ê前後庭院生活,食飯ê時陣,伊攏佇一个水池仔邊食,ná食,飯ná落落去水池仔底,拄好通飼池仔底ê一隻龜,日子一下久,彼隻龜煞成做黃妙應上好ê朋友。

        時間過得真緊,目一下nih,已經啊過了二十年。這一工,彼隻龜煞會開喙講話,伊開喙kā黃妙應講:你已經得欲出頭天啊!我是一隻佇這修練ê龜精,明仔載午時三刻就欲升天啊,佇升天進前,我會流目屎,你會當將我ê目屎ueh起來拭佇你ê目睭--ni,左目拭左目,正目拭正目,了後,正目會當觀天象,左目會當觀地理。第二工午時一到,黃妙應看著彼隻龜真正咧流目屎,伊就kā龜ê左蕊目睭ê目屎拭佇家己ê左蕊目睭頂懸,正蕊目睭就無閣拭啊,想講,兩粒目睭若攏拭,毋抵好若攏失明無看--ìnn,這馬軟骨就咧淒慘啊,啊若雙眼閣失明,毋著閣卡淒慘。突然間,黃妙應ê歸身軀筋骨開始疼--起來,閣無外久,漸漸袂疼啊,筋骨感覺硬-tsiānn-硬-tsiānn,出力kā徛起來看覓,ēe..,煞會當徛--起來,行看覓,閣會當行喔!伊才想講正蕊目睭猶未點咧,翻頭一下看,彼隻龜也已經升天而去。

        從此以後,黃妙應就以替人看風水地理為生,非常ê出名。有一工,伊ê阿兄問伊講:小弟啊,你這呢gâu看風水,哪毋替咱ê祖公仔揣一个好風水?黃妙應應講:好是好啦,毋閣,恐驚咱無彼ê福氣通享受!第二工,兩兄弟啊就kā祖公仔ê黃金甕仔挖--起來,欲揣一个好地理來埋葬。行啊行,來到一个大榕仔跤,天色也已經暗啊,黃妙應講:暫時咱就將黃金khǹg踮遮,明仔載才閣來揣。第三工,二兄弟來到--地,黃金甕仔煞無--去啊,阿兄講:tann欲按怎?黃妙應講:地理已經予咱得著啊,所以黃金嘛升天啊。阿兄聽著煞半信半疑。

        經過了一年,黃妙應ê阿嫂懷胎十個月得欲生產啊,黃妙應算算咧,顧佇厝--裡,毋敢離開三腳步,驚出門就出代誌。毋閣,來央請伊看風水ê人,再三懇求,黃妙應袂堪得人ê姑情,就按呢出門去囉。拄好黃妙應一踏出門無外久,伊ê阿嫂就生啊。頭一个生ê是查甫ê,毋過干焦一蕊目睭,而且一出世就會講話,講:一眼觀天象!怹老爸聽著驚一著,講這是一个妖怪,隨就kā tēnn--死。無外久,又閣出世一胎查甫ê,這个干焦生一隻手,而且嘛會講話,講:一手打天下!怹阿爸聽著驚kah皮皮tshuah,哪會見生都妖怪,這个嘛kā拍--死。煞--落來,又閣生了第三胎,這胎,五官端正,眉清眼秀,看著斯文斯文,一出世就開喙問講:啊大哥kah二哥咧?怹老爸應講:都攏予我拍--死啊,這个囡仔一下聽講大哥kah二哥已經死啊,煞咬舌自殺,嘛是死!

        黃妙應代誌辦煞,隨就趕轉來到厝,問講情形按怎?怹阿兄講:啊就連續生三个,如此這般。黃妙應真無奈,應講:無福氣就是無福氣,縱然揣會著好地理,嘛無一定得會著福報。正是:福地福人居,無福別人得,只恨枝無葉,莫怨太陽偏!

女人莫學買臣妻

    頂一回咱講民間流傳著一句話:男人莫效百里奚,女人莫學買臣妻。百里奚ê故事頂一回講了,這回欲來講買臣妻ê故事。

    漢朝ê時代,有一个貧窮ê書生,名叫朱買臣。朱買臣真愛讀冊,逐工都kā冊攬牢牢,伊逐工攏去野地抾柴,柴ná抾喙--裡詩詞文句就ná唸,抾ê柴揹去街市賣,所趁ê是m̄成錢,干焦勉強會當度三頓。朱買臣有娶一个某崔--氏,逐工kah朱買臣出去抾柴,毋過,崔氏毋是遐爾啊安貧kah樂道,伊逐工出門就se̍h-se̍h唸,罵朱買臣是一个戇書生,干焦會曉讀冊,無才調趁錢,逐年ê鄉試,逐年都落榜,叫伊換頭路閣毋肯。伊按呢逐工唸逐工吵,朱買臣ê心意攏無改變,顛倒苦勸怹某著愛忍耐,總有一工,伊一定會考著功名,予怹某過著榮華富貴ê日子。

    毋過崔氏漸漸失去耐性,伊聽從媒人婆ê使弄,想欲閣嫁予一个賣豬肉ê,若按呢,伊就逐工有豬肉通好食,毋免kah朱買臣食kah鹹酸苦tsiánn,閣穿kah衣衫襤褸。有一工,伊正式kā朱買臣講出伊想欲閣改嫁ê心內話,向望朱買臣會當成全伊,mài kā伊為難。朱買臣聽了非常ê傷心,就kā崔氏講:伊捌予人算過命,將來一定會飛黃騰達,請你閣忍耐--幾年啊。毋過,這時陣ê崔氏是食了秤錘,鐵了心腸,伊堅持欲自請休妻,向望朱買臣會當成全。朱買臣不得已,只好kā離婚書寫予伊。

    崔氏自從kah朱買臣離婚了後,真緊就嫁予彼个刣豬賣豬肉--ê,果然無錯,賣豬肉卡有豬肉通食,有影卡好過日。毋過,才無幾年niâ,賣豬肉ê翁煞破病,無氣力通好刣豬,手頭愈來愈ân,日子一工比一工卡歹過,人講,命若bái,閣嫁幾个嘛是歹命。閣無偌久,怹翁煞來過身--去,崔氏尾仔散kah不度,只好流落街頭,乞食為生。
朱買臣自從休妻了後,顛倒是兩耳清靜,會當清心讀冊,伊歡喜讀甘願讀,無怨無悔。過了沒幾年,伊終於考著舉人,做著會稽ê太守,太守ê地位比縣官卡大,就親像tsit-má ê省長欲仝款。朱買臣上任彼一工,鑼鼓隊佇頭前開路,tshinn-tshinn-tshann-tshann,非常鬧熱,朱買臣騎佇一隻大馬頂,邊仔tuè著一陣ê官衙護衛,威風凜凜。

    崔氏探聽著伊ê前夫朱買臣考著功名,衣錦還鄉,感覺真懊惱真後悔。伊閣想欲kah朱買臣破鏡重圓,所以伊就來到朱買臣se̍h街ê大路--裡,跪佇路中央求情。朱買臣停馬--一下看,原來是前妻崔氏,崔氏跪佇土腳苦苦哀求,希望朱買臣會當原諒伊過去ê絕情。毋過這陣ê朱買臣已經毋是卡早彼个朱買臣,伊隨喝下跤手人捾一桶ê水來,就向著崔氏講:這桶水kā潑去這隻馬ê頭殼頂,你若會當將潑--出去ê水攏閣kā收倒轉來,我就收留你,若無,請你勿閣來膏膏纏。崔氏將水潑上馬ê頭殼,sîn轉來ê水,三分都無一分。當然,潑--出去ê水欲哪有可能閣收倒轉來,崔氏只好恬恬來離開。
   
    這个故事亦就是「覆水難收」ê典故。

男人莫效百里奚

欲用聽--ê tshih遮→時間:6分51秒

    百里奚,五羊皮,憶前時,烹伏雌,炊扊扅,今日富貴忘我為!
Pik lí hê, ngó iông phî, ik tsiân sî, phing ho̍k tshú, tshui iám î, kim ji̍t hù kuì bōng ngó uî!
    百里奚,五羊皮,父粱肉,子啼饑,夫文繡,妻游衣。嗟乎,富貴忘我為?
Pik lí hê, ngó iông phî,hū liâng jio̍k, tsú thê ki, hu bûn siù, tshe iû i, Tsia--hoo hù kuì bōng ngó uî!
    百里奚,五羊皮,昔之日,君行而我啼,今之日,君坐而我離。嗟乎,富貴忘我為?
Pik lí hê, ngó iông phî,sik tsi ji̍t, kun hîng jî ngó thî, kim tsi ji̍t, kun tsō jî ngó lî, Tsia--hoo hù kuì bōng ngó uî!

    頂懸三tsuā詩詞是百里奚ê夫人杜氏所唱ê歌詞。翻作白話,意思是講:
百里奚啊百里奚,想起早前你欲離開彼當時,我刣雞母,拆門閂煮飯為你餞別,今仔日你得著榮華富貴,敢是kā我放袂記?
百里奚啊百里奚,你做老父--ê有飯有肉,恁囝是枵飢失頓,你做翁婿--ê穿kah媠媠,我做某--ê是衣衫襤褸。唉呀,你得著榮華富貴,敢是kā我放袂記?
百里奚啊百里奚,想起早前你欲離開彼當時,你ná行我ná哭,今仔日你坐佇遐,離我遠遠遠。唉呀,你得著榮華富貴,敢是kā我放袂記?

    佇2700年前,是中國ê春秋時代,有一个真出名ê大夫叫作百里奚。百里奚出世佇虞國,自細漢就無老父,kah老母過著艱苦ê日子,m̄閣百里奚認真讀冊,向望有一工會當入朝為官。到了三十幾歲,無人知影百里奚ê才華,母仔囝猶原過著貧困ê日子,彼一年,老母用全部ê家產,五領ê羊仔皮替伊娶杜氏為妻,生了後生孟明,日子猶原不度。百里奚決定欲離開故鄉去外面拍拼。

    百里奚來到了齊國,m̄閣百里奚初出茅廬,無人欲引薦,又閣來到宋國,拄著一个知音叫蹇叔,蹇叔將伊推薦予虞國大夫宮之奇,從此,百里奚做了虞國ê大夫,這中間,已經是過了十年啊。百里奚做官啊,所以伊就轉去故鄉,欲tshuā伊ê老母kah某囝上京,m̄閣,這十年來,故鄉拄著大天災,老母已經死啊,某囝嘛不知下落啊。

    百里奚雖然是大夫,m̄閣虞國國君昏庸,m̄聽百里奚kah宮之奇ê諫言(唇亡齒寒),煞予晉國來滅亡,百里奚煞成做晉國ê戰俘,變做一个奴隸。這時陣,晉國西爿ê秦國穆公向晉國求親(秦晉之好),百里奚成做一个陪嫁ê奴隸,心有不甘,佇半路就逃走,輾轉來到楚國,為楚國管理馬牛。秦穆公探聽出百里奚是一个不可多得ê人才,用計以五領羊仔皮去kā百里奚買--轉來。秦穆公重任百里奚做宰相,無幾年,秦穆公國力大增,成做歷史上ê春秋五霸。

    百里奚完成了少年時代ê夢想,m̄閣這時陣ê百里奚已經七十外歲啊,想起少年時陣,妻離子散,心情就鬱卒難以開朗。話講轉來百里奚ê家後杜氏,三四十年來,不時就咧揣伊ê翁婿,這擺,予伊探聽著秦國ê宰相號做百里奚,伊才揣機會進入宰相府,彈琴予百里奚聽,歌詞正是:百里奚,五羊皮,憶前時,烹伏雌,炊扊扅,今日富貴忘我為…。

    翁某分開四十年才閣相認,莫怪民間流傳著一句話講:男人莫效百里奚,女人莫學買臣妻。